Пиењето две до три шолји кафе дневно може да биде поврзано со подолг животен век, покажува новото истражување. Кафето, исто така, е поврзано и со помал ризик од кардиоваскуларни болести.
Наодите се однесуваат на мелени, инстант и бескофеински сорти на кафе, а истражувачите велат дека консумирањето кафе треба да се смета за дел од здравиот начин на живот.
Според студијата, најголемо намалување на ризикот е забележано со две до три шолји дневно.
Авторот на студијата, професорот Питер Кистлер од Институтот за истражување за срце и дијабетес Бејкер, Австралија, вели: „Во оваа голема, набљудувачка студија, инстант кафето и бескофеинското кафе беа поврзани со еквивалентно намалување на инциденцата на кардиоваскуларни болести и смрт од кардиоваскуларни болести“.
„Резултатите сугерираат дека благ до умерен внес на мелено, инстант кафе и кафе без кофеин треба да се смета за дел од здравиот начин на живот“, додава тој.
Студијата ги испитувала врските помеѓу видовите кафе и отчукувањата на срцето, кардиоваскуларните болести и смртта, користејќи податоци од студијата Биобанк во Велика Британија, која вклучувала лица на возраст меѓу 40 и 69 години.