Македонскиот ракометен шампион Вардар отпатува за Крањска Гора на подготовки каде ќе остане до 9 август, а потоа заминува за Германија на првиот турнир на кој ќе настапи пред почетокот на сезоната.
Откако ги завршија лекарските прегледи во Скопје и тренираа неколку денови, сега првиот тим на Вардар заминува на планина, на Крањска Гора, Словенија каде ќе ги одржи физичките подготовки.
Со екипата отпатуваа и тројца млади ракометари, Андреј Петковски, Марко Мишевски и Даниел Ставровски. Во Скопје единствено остана Даниел Ѓорѓески кој ќе работи по специјална програма како дел од рехабилитацијата по операцијата на лигаментите на коленото.
Во Словенија ќе се работи на подобрување на физичката подготвеност на ракометарите. На 9 август се заминува за Германија каде е планирано во перидот од 10 до 12 август да се настапи на турнир.
Според програмата на првиот ден (10 август) во 20.15 часот Вардар ќе игра со Хамбург.
Следниот ден (11 август) во зависност од резултатот од првиот натпревар, ќе се одиграат уште две средби со ривали од другите натпревари. На овој турнир ќе играат и екипите на: Лајпциг, Монпелје, Фуксе Берлин и Кристијанштад.