Карактеристичните куќи во бела и сина боја се белег на грчките дестинации како Миконос и Санторини. Самото гледање фотографии со архитектура во боите на грчкото знаме нè тера да посакаме да уживаме во прекрасните плажи и медитеранската кујна, но дали знаете што симболизираат карактеристичните бои на ведрото небо и море?
Боите на куќите на грчките острови се појавиле од практични причини. Каменот достапен на места како Миконос, Парос и Наксос имал еден недостаток – потемна, земјена боја која го привлекувала сонцето и го правела животот во куќите неиздржлив поради високите температури.
За да се оладат, Грците го обоиле каменот во бело, а откако таквиот метод се покажал успешен, на крајот станал дел од традицијата. Во средината на 20 век, бојата се вклучила и во архитектурата. За да се спречи ширењето на колерата, грчките власти побарале куќите да се варосуваат со вар, кој служи и како средство за дезинфекција.
Исто како и белата боја, и сината има свои „зошто и затоа“. Грчките рибари и морнари ги бојадисале вратите и прозорците со боја што останувала од бојадисувањето на бродовите, а сината била најдостапна поради својот состав. Карактеристичната сина боја што се користи за бродови и домови на грчките острови била направена од мешавина на варовник и средство за чистење „loulaki“, вид син талк што им бил лесно достапен на повеќето луѓе.
Убавите бои на куќите на грчките острови престанале да бидат само практични и пожелни, и станале задолжителни во текот на 1960-тите. Тогашниот режим верувал дека препознатливите бои ќе го поттикнат патриотизмот и национализмот, а наскоро бил донесен закон со кој било задолжително бојадисување на куќите на грчките острови во сина и бела боја.
Иако денешните прописи се порелаксирани, боите на грчките острови привлекуваат туристи, па традицијата продолжува. Талкајќи по Кикладите, посетителите можат да најдат домови со оригинални камења со боја на земја или малку поинакви бои. Сепак, сината и белата сè уште доминираат на грчките острови, по кои се познати низ целиот свет.