Патуваме

Мадеира – островот на цвеќињата

Блага клима, преубави падини, егзотична флора, примамливи кулинарски специјалитети. Ова е Мадеира, вистинска заводничка од Атлантикот.

Ова место со право се нарекува остров на вечната пролет. Благодарение на Голфската струја, летната температура на островот е пријатна, додека зимите се поблаги. Затоа Мадеира е една од омилените дестинации за одмор во текот на целата година. Иако овој португалски остров има површина од само 741 квадратен километар, тој нуди многу атракции: историски споменици, плоштади и улици во главниот град Функал, прекрасни градини, живописни села, фантастични пејзажи, необични вулкански кратери, преубави природни плажи и волшебни глетки.

На овој остров главните специјалитети се приготвуваат од риба, а најпознатото јадење е еспада – се прави од црни школки кои и денес ги има само во јапонските води. Тука е и еспетадата со ловор и месни раженчиња, како и кабрата и рибјата чорба со вино.

Селото Порто да Круз се наоѓа покрај брегот на северната страна на Мадеира. Овде ридовите се издигнуваат од морето до височина од 740 метри и нудат спектакуларен поглед. Типичната колоритна народна носија не ја носат само членовите на бројни музички групи, туку и продавачите на цвеќиња. На островот Порто Санто кој припаѓа на Мадеира, ќе го најдете она што им недостига на другите острови во Мадеира – песочни плажи долги со километри, како што е Вила Баеира; поради златно-жолтиот песок се нарекува и Илха Дорада. Во најпознатиот маркет во Функал владее жива, бучна и весела атмосфера. Посетителите може да очекуваат богата понуда на цвеќиња, овошје, зеленчук, месо, риба и сирење. Со висина од околу 590 метри, Пена де Агуја, остров од карпи, изгледа импресивно. Ридот е тешко пристапен, а името го добил по орлите кои некогаш го населувале.

Во целиот свет е познато виното од овој остров, кое не се служи со оброк, туку како аперитив или десерт.

Можеби ќе ве интересира

Токио, град од соништата

admin

Мароко – портата на Африка

dart

Места во Турција кои мора да ги посетите

admin

Овој сајт користи колачиња за подобрување на корисничкиот интерфејс. Прифати Прочитај

Почитувани! Не е дозволено копирање на текстови од Прекрасен свет.