Забава

Значењето на Велипеток за христијанството

 

Велики Петок е христијански празник, ден од Страдалната Седмица, посветен на споменувањето на осудувањето на Исус Христос, Крстните страдања и смртта на нашиот Спасител.

Одлуката за погубување на Христос на Велика Среда ја донело еврејското црковно собрание (Синедрионот). Исус Христос бил пронајден и уапсен кај Гетсиманската градина, по Тајната вечера, ноќта меѓу Велики Четврток и Велики Петок. Ноќта Христос бил мачен и камшикуван, за на крајот да биде изведен пред Понтиј Пилат, римскиот намесник за Јудеја. Тој на почетокот изјавувал дека не наоѓа никаква вина за која би можел да го осуди Христос. Но фарисеите, гледајќи дека Исус може да биде ослободен, го наклеветиле дека се прогласил себеси за цар и со тоа всушност се кренал против Рим и императорот. За таков грев Римјаните морале да го казнат сторителот.

Бидејќи било Пасха – најголемиот еврејски празник за кој било вообичаено да се ослободи еден затвореник, Пилат го прашал насобраниот народ кој затвореник сакаат да биде ослободен: Исус или Варава – разбојник кој убил неколку римски војници. Насобраниот народ, подбуцнат повторно од фарисеите, барал да се ослободи Варава. На прашањето на Пилат што да прави со Исус, народот извикувал “Распни го! Распни го!”. Затоа, откако ја изрекол пресудата, Понтиј Пилат ги измил рацете и му се обратил на насобраниот народ со зборовите: “Јас не сум виновен за смртта на овој праведник”.

На Христос му бил ставен венец од трње на главата и тежок крст на плеќите кој го носел до ридот Голгота, каде што е распнат. По патот тој бил плукан и навредуван од мнозинството народ. Но, таму се нашол и еден добар човек по име Симон од Киринеја, кој се сожалил и му помогнал на Исус да го носи крстот. И денес по 2000 години, патот по кој тој одел е познат како пат на болката.

На Голгота биле поставени три крста. Крстот на Исус бил во средината, а од страните биле распнати двајца разбојници. Дури и на крстот Исус побарал прошка од Бога за своите џелати, извикувајќи: “Оче, прости им зашто не знаат што прават”. Кога околу три часот попладне ја предал својата душа на Бог, Сонцето се помрачило, се отворале гробови, земјата се тресела, пердето во храмот се разделило на половина, карпи пукале со страшен звук. Со тоа се обистиниле Исусовите зборови дека “и мртвите камења ќе сведочат за живиот Бог”.

Покрај крстот останале Богородица, апостолот Јован, Марија Магдалена и уште неколку жени. Нема и скаменета од болка Богородица го гледала безживотното тело на својот син. Јосиф од Ариматеја отишол кај Пилат и го замолил за дозвола телото на Исус да го симнат од крстот и да го погребат. Бидејќи утредента било сабота (кога ништо не се работи), за да не стои телото три дена на крстот, Пилат дал дозвола да го погребат. Исусовото тело го обвиткале во платно и го однеле во нова гробница, која Јосиф ја подготвил за себе. Гробот бил издлабен во карпа, на чиј влез Римјаните поставиле огромен камен и стражи, плашејќи се дека некој може да го украде телото.

Велики Петок се празнува со свети литургии и принесување на бескрвна жртва, со читање извадоци од евангелијата од делот кој ја опишува неделата на страдањата на Синот божји. Времето на смртта и симнувањето на телото Христово од крстот во Црквата се одбележува со вечерно богослужење и со посебен ритуал на изнесување на покривката на посебно украсена маса пред олтарот, кој го симболизира гробот на Христос. Потоа трипати се обиколува црквата со покривката што го симболизира Исусовото погребување, придружено со звуци на тропала.

Црвената прекривка на која се извезени слики од Господовото страдање стои пред олтарот и се целива до денот на неговото воскресение. Обичај е на тој ден да се вапсаат велигденски јајца во црвена боја, која симболично ја претставува невино пролеаната крв на Христос. Според христијанското учење, страдањето му претходи на воскресението, а без страдање и смрт нема воскресение.

Православниот канон за Велипеток предвидува строг пост со вода, а многу верници на тој ден не пијат и не јадат до зајдисонце. За овој ден Црквата пропишува најстрог пост, денот да помине без јадење и пиење (освен за немоќните и престарените), во знак на таговно сеќавање на настаните од она време. Покрај постот, на денот на христијанската жалост не се работи по дома, ниту на поле.

 

Слични написи

Најдобрите сопрузи се родени во овој хороскопски знак

dart

Најтоплиот ден во историјата на Австралија

Biba

Обувки што не се препорачуваат кога возите автомобил

Biba

Овој сајт користи колачиња за подобрување на корисничкиот интерфејс. Прифати Прочитај

Почитувани! Не е дозволено копирање на текстови од Прекрасен свет.