Дека е опасно да се држи лаптоп во скут е одамна познато – научниците предупредуваат дека може да се добијат опекотини и други здравствени проблеми, а најновите истражувања укажуваат и на дисколорација на кожата.
Едно 12-годишно дете заболело од овој необичен синдром откако неколку месеци секој ден го држело лаптопот во скут додека играло видеоигри. Детето осетило дека лаптопот на едната страна е малку потопол, но не направил ништо во врска со тоа.
Исто така, една студентка во Вирџинија побарала помош од нејзиниот лекар заради тоа што кожата на нозете ѝ потемнела. Лекарите биле збунети, сè додека девојката не кажала дека држела лаптоп во скут по 6 часа на ден.
Кожата под микроскоп изгледа како долго да била изложена на сонце.
Проблемот се јавува кога претерано ќе се изложиме на топлина која инаку не е доволно силна за да предизвика опекотини. Обично доведува само до дисколорација на кожата, но може да нанесе и штета која доведува до рак на кожата, предупредуваат лекарите. Тие препорачуваат во скутот да се стави некаква заштита од топлината, ако мора лаптопот да се држи во скут. И големите производители на лаптопи предупредуваат да не се чува лаптопот во скут.
Пред неколку години, научниците открија дека држењето на лаптопот во скут предизвикува загревање на тестисите, што може да резултира со намалување на бројот на сперматозоиди, а може да доведе дури и до неплодност.
Во минатото, синдромот на дисколорација на кожата бил забележан само кај професиите кои вклучувале долго работење покрај извор на топлина, како што се на пример пекарите и производителите на стакло.
Пред воведувањето на централното греење, од овој синдром заболувале и луѓе кои седеле премногу блиску до печката, а познати се и случаи кои го добиле заради претерано користење термофор.