Како да бидете сити со помалку јадење

 

Како да го згаснете гладот со помош на здрава храна, или – како да јадеме помалку, а да бидеме сити – стана сериозно прашање, вели специјалистот за дебелина, д-р Алекс Џонстон од Институтот за исхрана и здравје во Абердин. Научните откритија брзо ги следи и бизнисот, т.е. производителите на храна и разни додатоци на исхраната. Само во Велика Британија во текот на една година се трошат околу 45 милиони фунти на разни “здрави” производи кои помагаат во слабеењето и одржувањето на линијата.

Сепак, научниците нагласуваат дека и обична, секојдневна храна може многу да помогне во слабеењето и одржување на чувството на ситост без нуспојави. Само треба да се свртиме кон здрави намирници. “Иронијата е тоа што како доенчиња имаме биолошки сигнал кој ни кажува кога сме навистина сити. Тој сигнал почнува да слабее околу третата година од животот. Тука почнува и притисокот од родителите да се изеде сè што има во чинијата, а храната се нуди и како награда помеѓу оброците, што го потиснува сигналот за ситост”, вели Марион Хетерингтон, професорка по биопсихологија на Универзитетот во Лидс.

Кога се здебелуваме, хормонот одговорен за ситост наречен PYY (пептид YY) се намалува. “Дебелината го намалува нивото на овој хормон, па затоа и сигналот за ситост настапува подоцна”, вели д-р Рејчел Батерхем која го истражувала овој хормон. Научниците ги советуваат следните докажани начини да се “измами” телото да мисли дека е сито:

Изедете јаболко. Овошјето и зеленчукот содржат многу вода, воздух и влакна кои произведуваат чувство на ситост. Јаболката, на пример, содржат 25 % воздух, а за време на дигестијата го произведуваат хормонот GLP-1, кој испраќа сигнали на ситост во мозокот. Трикот се состои во тоа да изедете намирница која заситува на почетокот на оброкот. Можеби ручекот кој започнува со чинија јаболка не ви изгледа примамливо, но јаболката можете да ги замените со зелена салата која има подеднакво добри ефекти.

Зголемете го внесот на протеини. Од трите групи храна протеините највеќе заситуваат (во споредба со јаглените хидрати и мастите). Што ги прави толку заситни? Протеините го поттикнуваат производството на хормонот PYY и стимулираат ослободување на глукоза во дигестивниот тракт.

Одберете вискозна храна. Текстурата и вискозитетот на храната влијаат на чувството на ситост. Од таа причина, на пример, супата заситува. Ставете пред некого чинија со храна и можеби за три часа повторно ќе биде гладен. Но, ако истите состојки ги ставите во супа, периодот на ситост ќе се продолжи и покрај тоа што е намален волуменот на храната. Научниците откриле дека вискозноста на овесната каша ја прави многу повеќе заситна во однос на муслите, и покрај тоа што главната состојка е иста.

Течноста не е доволна. И додека вискозната храна како овесна каша или пире од компири заситува, не може да се добие истиот ефект од течностите. Сигналите за ситост од течностите се многу послаби, па затоа преку нив може да се внесат многу калории без да се осетите сити. Причината е тоа што не треба многу да се џвака и малку енергија се троши на дигестија, па затоа и покрај количината на калории, течноста не испраќа исти сигнали до мозокот.

Јадете сами. Студиите покажуваат дека јадеме и до 70 % повеќе кога нешто ни го одвраќа вниманието од храната, како на пример кога гледаме телевизија. Исто така, повеќе јадеме и кога сме со семејството и пријателите. Ако јадете сами – помалку ќе изедете. Но, не брзајте, дајте си доволно време за добро да ја изџвакате храната, зашто на тој начин ќе му овозможите на PYY хормонот да се ослободи и да испрати стоп сигнал до мозокот.

 

Забрането е копирање на текстот!