Синоќешниот натпревар од финалето на Лига Европа во Баку го донесе шампионот за 2018/19 година, Челси.
Играчите на Челси покажаа надмоќ врз своите градски ривали и со резултат 4:1 го демолираа Арсенал.
Стадионот во Баку беше полупразен, што не е својствено за натпревар од ваков калибар.
Натпреварот започна внимателно од двете страни, но како што одминуваше времето стануваше динамично. Првата посериозна акција ја имаа играчите на Арсенал кога во деветтата минута, кога Абумејанг шутираше покрај голот. Во продолжението Арсенал имаше убава и квалитетна игра. Промена на резултатот немаше до крајот на првото полувреме.
Со голот на Жиро во четвртата минута од второто полувреме Челси поведе со 1:0. Единаесет минути подоцна Челси ја зголеми разликата на 2:0 со голот на Педро, а Хазард набрзо постигнува гол од пенал и зголеми на 3:0.
Серијата на постигнување голови не запре и Ивоби со гол од 18 метри ја намали резултатската разлика на 3:1, но радоста и надежта на Арсенал не траеше долго, бидејќи брилијантниот Хазард го запечати резултатот со својот гол по прекрасно изведена акција.