Се препорачува градниците да се исперат после две до четири носења, под услов да немаат видливи нечистотии, флеки или траги од млеко ако доите. Се разбира, ако многу се потите и користите лосиони и парфеми за тело, може да ги перете и почесто. Исто така, се препорачува секој градник да го “одморите” барем еден ден пред повторно да го облечете.
Кожата постојано се обновува и ги отфрла мртвите клетки, а наборите околу градите постојано се топли и се потат. Градникот е дел од облеката кој е тесно припиен до телото и лесно ги впива сите телесни мириси и нечистотии.
Квалитетниот градник треба да трае помеѓу шест месеци и две години, во зависност од тоа како го одржувате. Идеално би било градникот да се пере на рака во ладна вода и да се суши на сув пешкир во сенка. Меѓутоа, тоа не е секогаш возможно, посебно ако имате бебе или сте презафатени со работа.
Некои основни модели на градници кои немаат жица можат да се перат и во машина на нежен циклус, но најдобро е да се следи упатството за одржување што го има на секој градник.
Шест едноставни начини на кои ќе го продолжите рокот на траење на вашите градници
- Користете мрежеста вреќичка за машинско перење. На овој начин ќе избегнете градникот да се закачи за друго парче облека и да го оштети или самиот да се оштети, и ако има жица ќе избегнете да се искриви под притисок на центрифугата.
- Градникот перете го во ладна вода. Секогаш. Ако мора да го ставите во машина, тогаш водата нека биде млака. Повеќето градници се памучни, а памукот се собира на високи температури, па затоа жицата го кине и излегува од него.
- Користете нежни детергенти за перење. А можете и сами да направите детергент од една чаша топла вода во која ќе ставите една лажичка бебешки шампон. Измешајте убаво и оваа мешавина додајте ја во машината за перење или во водата ако рачно го перете градникот. Може да ставите и неколку капки етерично масло по ваш избор, за поубав мирис.
- Внимавајте на бојата. Градниците со бела и други светли бои перете ги со светла облека, а темните со темна. На овој начин подолго ќе ја зачувате свежината на боите на вашиот градник.
- Сушете ги на воздух. Никогаш не го ставајте градникот во машина за сушење алишта, затоа што е составен од повеќе различни текстилни влакна, од кои повеќето се осетливи на топлина. Сушалната ќе го собере градникот, што директно ќе влијае на тоа како ќе ви стои и дали големината ќе ви одговара. Исто така, топлиот воздух ќе ја ослабне текстилната структура што ќе резултира со кинење, растегнување и оштетување на градникот. Секогаш сушете ги градниците закачени на жица за сушење или послани на сув пешкир и по можност подалеку од директно изложување на сонце, за да не избледат боите на градникот.
- Чувајте ги на соодветен начин. Откако сте ги испрале и исушиле, градниците чувајте ги во фиока заедно со другата долна облека. Корпите ставете ги една во друга и внимавајте да не се згмечени или притиснати, погрижете се фиоката да има доволно место за градниците да бидат уредно наредени во неа.